ប្រែសម្រួល៖ស-សម្បត្តិ

វ៉ាស៊ីនតោន៖ លោកប្រធានាធិបតី Donald Trump បានថ្លែងកាលពីថ្ងៃអាទិត្យ (ថ្ងៃទី៩ កុម្ភៈ) ថា សហរដ្ឋអាមេរិកនឹងដាក់ពន្ធគយ ២៥ភាគរយលើការនាំចូលដែក និងអាលុយមីញ៉ូមនៅសប្តាហ៍នេះ ដែលជាការប្រកាសពន្ធគយចុងក្រោយបំផុតក្នុងចំណោមពន្ធគយជាច្រើនដែលលោកបានប្រកាស។

លោក Trump បានប្រាប់អ្នកសារព័ត៌មាននៅលើយន្តហោះ Air Force One ថា ពន្ធគយដែលលោកនឹងប្រកាសនៅថ្ងៃចន្ទ នឹងអនុវត្តលើ “ដែកទាំងអស់ដែលនាំចូលមកសហរដ្ឋអាមេរិក” ហើយនឹងប៉ះពាល់ដល់អាលុយមីញ៉ូមផងដែរ។

លោក Trump បានដាក់ពន្ធគយប្រហាក់ប្រហែលគ្នានេះក្នុងអំឡុងពេលធ្វើជាប្រធានាធិបតីរបស់លោកពីឆ្នាំ២០១៧-២០២១ ដើម្បីការពារឧស្សាហកម្មសហរដ្ឋអាមេរិក ដែលលោកជឿថាប្រឈមនឹងការប្រកួតប្រជែងមិនស្មើភាពពីប្រទេសនៅអាស៊ី និងអឺរ៉ុប។

ប្រទេសកាណាដា ដែលលោក Trump បានគំរាមដាក់ពន្ធគយរួចហើយ គឺជាប្រភពនាំចូលដែក និងអាលុយមីញ៉ូមធំជាងគេមកសហរដ្ឋអាមេរិក យោងតាមទិន្នន័យពាណិជ្ជកម្មអាមេរិក។ ប្រទេសប្រេស៊ីល ម៉ិកស៊ិក និងកូរ៉េខាងត្បូង ក៏ជាប្រទេសផ្គត់ផ្គង់ដែកសំខាន់ៗដល់សហរដ្ឋអាមេរិកផងដែរ។

នៅថ្ងៃអាទិត្យ មហាសេដ្ឋីបក្សសាធារណរដ្ឋរូបនេះក៏បានថ្លែងថា លោកនឹងប្រកាសអំពី “ពន្ធគយទៅវិញទៅមក” ដើម្បីឲ្យស្របនឹងអត្រាពន្ធដែលប្រទេសផ្សេងៗគិតលើផលិតផលអាមេរិក។

លោកថ្លែងថា “គ្រប់ប្រទេសនឹងទទួលបានការប្រព្រឹត្តិដូចគ្នា” ដោយបន្ថែមថា លោកនឹងធ្វើការប្រកាសលម្អិតអំពីពន្ធគយនេះនៅថ្ងៃអង្គារ ឬថ្ងៃពុធ។

ប្រធានាធិបតីរូបនេះបានបង្ហាញពីចំណូលចិត្តរបស់លោកក្នុងការប្រើប្រាស់អំណាចហិរញ្ញវត្ថុរបស់សហរដ្ឋអាមេរិកជាអាវុធ ដោយបានចេញបទបញ្ជាដាក់ពន្ធគយលើដៃគូពាណិជ្ជកម្មសំខាន់ៗដូចជា ចិន ម៉ិកស៊ិក និងកាណាដា ភ្លាមៗបន្ទាប់ពីលោកចូលកាន់តំណែង។

លោកបានផ្អាកការដាក់ពន្ធគយ ២៥ភាគរយប្រឆាំងនឹងប្រទេសកាណាដា និងម៉ិកស៊ិករយៈពេលមួយខែ បន្ទាប់ពីប្រទេសទាំងពីរបានសន្យាថានឹងបង្កើនវិធានការប្រឆាំងនឹងការហូរចូលគ្រឿងញៀន fentanyl និងការឆ្លងដែនរបស់ជនអន្តោប្រវេសន៍ខុសច្បាប់ចូលទៅសហរដ្ឋអាមេរិក។

ទោះយ៉ាងណា ពន្ធគយប្រឆាំងនឹងប្រទេសចិននៅតែបន្តអនុវត្ត ដោយផលិតផលដែលនាំចូលទៅសហរដ្ឋអាមេរិកត្រូវបង់ពន្ធបន្ថែម ១០ភាគរយចាប់តាំងពីថ្ងៃអង្គារមក។

ប៉េកាំងបានឆ្លើយតបដោយដាក់ពន្ធគយគោលដៅលើផលិតផលអាមេរិកមួយចំនួន ដូចជាធ្យូងថ្ម និងឧស្ម័នធម្មជាតិរាវ ដែលនឹងចាប់ផ្តើមអនុវត្តនៅថ្ងៃចន្ទ។

ពន្ធគយថ្មីរបស់ចិនគ្របដណ្តប់លើទំនិញអាមេរិកដែលមានតម្លៃ ១៤ពាន់លានដុល្លារ ខណៈដែលពន្ធគយដែលប្រកាសដោយលោក Trump គ្របដណ្តប់លើទំនិញចិនដែលមានតម្លៃ ៥២៥ពាន់លានដុល្លារ យោងតាម Goldman Sachs។

• “យុគសម័យមាស”

លោក Trump ក៏បានសន្យាដាក់ពន្ធគយលើសហភាពអឺរ៉ុប និងបានថ្លែងថា លោកនឹងប្រកាសអំពី “ពន្ធគយទៅវិញទៅមក” ដែលមិនទាន់បានបញ្ជាក់នៅឡើយក្នុងពេលឆាប់ៗនេះ។

ប្រធានាធិបតីបារាំង Emmanuel Macron បានសន្យាក្នុងបទសម្ភាសន៍មួយដែលផ្សាយកាលពីថ្ងៃអាទិត្យថា នឹងប្រឈមមុខដាក់គ្នាជាមួយលោក Trump អំពីការគំរាមកំហែងផ្នែកហិរញ្ញវត្ថុរបស់លោកទៅលើអឺរ៉ុប ប៉ុន្តែលោកបានថ្លែងថា សហរដ្ឋអាមេរិកគួរផ្តោតការខិតខំប្រឹងប្រែងរបស់ខ្លួនលើប្រទេសចិនជាជាងសហភាពអឺរ៉ុប។

លោក Macron ក៏បានព្រមានតាមទូរទស្សន៍ CNN ផងដែរថា ជនជាតិអាមេរិកនឹងទទួលរងផលប៉ះពាល់ពីពន្ធគយណាមួយដែលដាក់លើអឺរ៉ុប ដោយថ្លែងថា ពន្ធគយទាំងនោះ “នឹងបង្កើនថ្លៃដើម និងបង្កើតអតិផរណានៅសហរដ្ឋអាមេរិក”។

ហើយក្នុងជំនួបដ៏រាក់ទាក់មួយកាលពីថ្ងៃសុក្រជាមួយនាយករដ្ឋមន្ត្រីជប៉ុន Shigeru Ishiba លោក Trump បានព្រមានថា តូក្យូនៅតែអាចប្រឈមនឹងពន្ធគយលើទំនិញនាំចេញ ប្រសិនបើមិនអាចកាត់បន្ថយឱនភាពពាណិជ្ជកម្មរបស់សហរដ្ឋអាមេរិកជាមួយជប៉ុនឱ្យនៅត្រឹមសូន្យ។

ឱនភាពពាណិជ្ជកម្មរបស់សហរដ្ឋអាមេរិក ដែលជាសេដ្ឋកិច្ចធំជាងគេលើពិភពលោក បានកើនឡើងដល់ជិត ៩២០ពាន់លានដុល្លារកាលពីឆ្នាំមុន។

លោក Trump ដែលបានសន្យាអំពី “យុគសម័យមាសថ្មី” សម្រាប់សហរដ្ឋអាមេរិក បានអះអាងថា ផលប៉ះពាល់នៃពន្ធគយទាំងឡាយនឹងត្រូវទទួលរងដោយអ្នកនាំចេញបរទេស ដោយមិនបញ្ជូនបន្តទៅអ្នកប្រើប្រាស់អាមេរិកទេ ទោះបីជាអ្នកជំនាញភាគច្រើនថ្លែងផ្ទុយពីនេះក៏ដោយ។

ប៉ុន្តែលោកបានទទួលស្គាល់បន្ទាប់ពីប្រកាសពន្ធគយលើប្រទេសម៉ិកស៊ិក កាណាដា និងចិនកាលពីដើមខែនេះថា ជនជាតិអាមេរិកអាចនឹងទទួលរង “ការឈឺចាប់” ផ្នែកសេដ្ឋកិច្ច។

លោក Trump បានប្រើប្រាស់ពន្ធគយជាការគំរាមកំហែងដើម្បីសម្រេចគោលដៅគោលនយោបាយទូលំទូលាយរបស់លោក ដែលថ្មីៗបំផុតនេះ គឺនៅពេលដែលលោកបានថ្លែងថា នឹងដាក់ពន្ធគយលើប្រទេសកូឡុំប៊ី នៅពេលដែលប្រទេសនេះបានបដិសេធយន្តហោះយោធាអាមេរិកដែលដឹកជនអន្តោប្រវេសន៍ដែលត្រូវបាននិរទេស។

បន្ទាប់ពីការប្រឈមមុខដាក់គ្នាជាមួយលោក Trump អស់មួយថ្ងៃ រដ្ឋាភិបាលកូឡុំប៊ីបានចុះចាញ់៕

ប្រភព៖ AFP/rc/ec